第一次寫網誌，並不是希望有人來看，只是希望可以有一個渠道表達自己心中所想，更希望可以藉此訓練自己的文筆（次次作文均60分以下，想高分些少都難）同打字能力（皆因本小姐的打字速度屬於龜等）。

 每次cilk入別人的blog，每次都以"嘩~"一聲作開場白，何解個個都咁有才華，篇篇文章都可以咁長？相信以本小姐的龜速要幾鐘頭先可以打得完，仲要唔計苦苦思索的時間，相信計埋的話要一整天的時間坐係個電腦面前方可。究竟本小姐要打多少篇文先可以有佢地咁的速度？

入左去嘩完之後，睇埋佢地的文章才真正的佩服得五體投地，同時亦沮喪得五體投地orz，何解個個的文筆都可以咁好？簡直可以出書了！相比之下，自己的文章就只是初生之犢，放上來相信是不怕死的表現而已，不會遭人炮轟就已經是萬幸了。